Өмнөд Солонгосын батлан хамгаалах яам Умард Солонгосыг тив алгасагч баллистик пуужин хэзээ мөдгүй турших нь гэсэн болгоомжлолын үүднээс цэрэг армиа өндөржүүлсэн бэлэн байдалд оруулжээ. Умард Солонгос тив алгасагч баллистик пуужингаа удирдагч Ким Чен Уны тогтоосон ямар ч байршилаас хэзээ ч хөөргөж магадгүй гэдгээ сая ням гарагт мэдэгдсэн юм.
Мөн Умард Солонгосын залуу удирдагч Шинэ жилийн мэндчилгээний үгэндээ ч улс орон нь тив дамнах хүчин чадалтай пуужин турших бэлтгэл ажлыг үндсэндээ дуусаж байгаа тухайг онцолсон. Пхеньяны эдгээр мэдэгдлийг Өмнөд Солонгосын батлан хамгаалах яам бодит үндэслэлтэй гэж үзээд, тус улсын үйл хөдлөл бүрийг ойроос ажиглаж байгаагаа мэдэгдэж байна. Гэхдээ Өмнөдийн тал хойд хөршийнхөө тив алгасагч пуужингийн технологийг тодорхой түвшинд хүрсэн, гэхдээ дэвшилтэт түвшинд ахиж хүрээгүй гэж үзэж байгаа юм байна. Энэ хооронд Өмнөд Солонгосын эв нэгдлийн яам мөн хэвлэлийн бага хурал зарлаж, Умард Солонгос АНУ-ын ерөнхийлөгчөөр сонгогдсон Дональд Трампын тангараг өргөх ёслолыг угтаж, улс орных нь эсрэг баримтлаж байгаа байр сууриа өөрчлөхөд нь Вашингтонд шахалт үзүүлэх зорилгоор тив алгасагч пуужин хөөргөх асуудлыг гаргаж тавьж байна гэсэн таамгийг дэвшүүлсэн байна.
